Билал ауыл китапханаһында төрлө проекттар бик күп. Уҡыусылар өсөн “Китапханаға кил, дуҫтарыңды ла саҡыр” проекты уңышлы эшләй. Уның шарты буйынса уҡыусылар, класс етәксеһе менән бергәләп китапханаға киләләр, китапханала улар өсөн китапхана дәрестәре үтә. Артабан китапханаға килгән уҡыусылар үҙҙеренең дуҫтарын, башҡа синыф уҡыусыларын китапханаға саҡырырға тейеш.
Бөгөн беҙ Эльмира Морат ҡыҙының уҡыусылары менән берлектә Земфира Сәхипованың “Тыуған ерем, туған телем” исемле китапты өйрәндек. Шулай уҡ, “Кил һин беҙҙең тирмәгә!” исемле әкиәттәр китабынан яңы әкиәттәр белдек. Уҡыусылар үҙҙәре лә шиғыр ятланы, әкиәттәр һөйләне. Бөгөнгә дәрес тамам. Артабан китапханаға кемдәр килер, әлегә бер кем белмәй, уны III класс уҡыусылары үҙҙәре билдәләй. “Китапханаға барҙым, дуҫым, һине лә саҡырам”, тип кемдәргә әйтерҙәр, иртәгә билдәле буласаҡ. Беҙҙең менән бергә ҡалығыҙ!
